Kennarar ekki á eitt sáttir

Verkfall grunnskólakennara hefur verið blásið af. Miðlunartillaga er á leið til allra grunnskólakennara landsins. Forsætisráðherra segist sannfærður um að kennarar muni samþykkja tillöguna, en trúnaðarmenn kennara efast. Kennarar fóru fram á rausnarlega eingreiðslu á fundi Fræðsluráðs í dag til að geta endurskoðað kennsluáætlanir að afloknu verkfalli. Sáttasemjari lagði fram miðlunartillögu laust eftir miðnætti. Hún ásamt atkvæðaseðli verður send til allra kennara með pósti. Atkvæðin þurfa að vera komin í hendur sáttasemjara fyrir klukkan eitt mánudaginn 8. nóvember. Þann sama dag verða atkvæði talin og þá ræðst hvort kennarar hafa samþykkt miðlunartillöguna eða fellt hana. Verði hún felld brestur verkfall á að nýju þriðjudaginn 9. nóvember. Fátt fæst uppgefið um innihald miðlunartillögunnar. Eiríkur Jónsson, formaður Kennarasambandsins segir tillöguna ekki þann samning sem þeir hefðu gert, enda hefði þá verið gerður kjarasamningur sem þeir hefðu mælt með. Þeir hafi ekki mælt með þessari tillögu sem hugsanlegum kjarasamningi. Eiríkur segist í raun hvorki sáttur né ósáttur við tillöguna, valdið sé nú í höndum kennaranna sjálfra sem verði að taka ákvörðun um framhaldið. Forsætisráðherra segir mikinn létti að kennaraverkfallinu hafi verið frestað, og hann er sannfærður um að tillagan verði ekki felld. Halldór Ásgrímsson segist vilja ganga út frá því að tillagan verði samþykkt, enda felist í henni mikil kjarabót fyrir kennara. Þessu eru langt í frá allir kennarar sammála. Það var að heyra á trúnaðarmönnum kennara á höfuðborgarsvæðinu sem hittust síðdegis að óánægja væri með miðlunartillöguna og allt eins líklegt að hún yrði felld. Þeir eru raunar ósáttir við að verkfalli sé frestað og samþykktu á fundi í gær ályktun um að verkfalli yrði haldið áfram á meðan atkvæðagreiðsla stæði yfir. Ólafur Loftsson, formaður kennarafélags Reykjavíkur segir að í dag hafi verið farið fram á eingreiðslu til kennara vegna þeirrar röskunar sem orðið hafi á kennsluáætlun í verkfallinu. Ólafur segir það fræðsluráðs að svara hvort komið verði til móts við þessa beiðni, en Stefán Jón Hafstein, formaður Fræðsluráðs vill ekki tjá sig um það sem fram fer á fundum fræðsluráðs.