Synjað um ferðaþjónustu fatlaðra

Þremur fötluðum ellilífeyrisiþegum hefur verið synjað um ferðaþjónustu fatlaðra í þessari viku á þeim forsendum að þeir séu of gamlir. Í synjuninni er stuðst við nýjar reglur sem enn hafa ekki verið samþykktar. Mistök sem verða leiðrétt, segir formaður félagsmálaráðs. Á Grensásdeild Landspítala koma árlega fjölmargir hreyfihamlaðir ellilífeyrisþegar sem þurfa aðstoð við að komast til og frá heimili sínu. Þetta fólk hefur hingað til notið ferðaþjónustu fatlaðra en á því virðist vera að verða breyting. Einn þeirra þriggja sem synjað hefur verið um þjónustuna er Guðrún Jónsdóttir. Hún missti fótinn í september síðastliðnum. Guðrún hefur legið á sjúkrahúsi um nokkurra mánaða skeið. Hún getur nú verið heima á kvöldin og um helgar en kemur í þjálfun og endurhæfingu á Grensás á morgnana. Til að komast þangað þarf hún á ferðaþjónustu fatlaðra að halda en hún fékk synjun í fyrradag. Guðrún segir að hún hafi fengið þau svör að fólk eldra en 67 ára yrði ekki keyrt. Guðrún segir eiginmann sinn hlaupa undir bagga. Hann þurfi að vísu að mæta í vinnu á morgnana en önnur leið er ekki fær. Og þó Guðrún beri sig vel þá er hún ekki ánægð. Hún segir þetta fáránlegt og sér ekki tilganginn með þessu. Henni finnist frábært að sjá gamalt fólk reyna að komast í æfingar og leggja mikið á sig til þess að geta bjargað sér heima. Það geti ekki gert það ef það fái ekki æfingar. Starfsfólk Grensás segir að trúnaðarlæknir Reykjavíkurborgar hafi synjað þessu fullorðna fólki um akstur í skjóli nýrra reglna um akstur fatlaðra. Björk Vilhlemsdóttir, formaður félagsmálaráðs, segir að borgarráð hafi ekki enn samþykkt nýju reglurnar og því sé ekki hægt að vinna samkvæmt þeim. Henni sýnist þetta mistök. Í þessu tilviki ætti Guðrún að fá ferðaþjónustu.