Hóta að beita Rússum frekari þvingunum

Evrópusambandið hyggst beita Rússum frekari viðskiptaþvingunum verði ekki staðið við nýgerðan vopnahléssamning vegna ástandsins í Úkraínu sem samþykktur var í hvítrússnesku höfuðborginni Minsk í dag.

Angela Merkel Þýskalandskanslari greindi frá þessu að loknum leiðtogafundi aðildarríkja Evrópusambandsins fyrr í kvöld.

Merkel greindi frá því á blaðamannafundi að leiðtogar aðildarríkja hafi beðið framkvæmdastjórn sambandsins um að undirbúa frekari viðskiptaþvinganir, sem ráðist verði í, verði ekki farið að ákvæðum friðarsamningsins.  Þetta kemur fram í frétt Reuters.

„Við höldum þeim möguleika opnum, að ef ekki verði farið eftir þessum samningum, þá verðum við að grípa til frekari ráðstafana,“ sagði Merkel.