Meiri trú á viðskiptalífinu en stjórnmálaflokkum

Um 53% Íslendinga telja spillingu hafa aukist á síðustu þremur árum, 32% telja hana hafa staðið í stað og að mati 15% hefur dregið úr spillingu. Þetta eru niðurstöður könnunar sem Capacent gerði fyrir hönd Transparency International.

Könnunin sem Capacent á Íslandi gerði er hluti af alþjóðlegri könnun sem gerð var. Samkvæmt niðurstöðum þeirrar könnunar hefur spilling aukist verulega í heiminum á undanförnum þremur árum að mati 60% þeirra sem tóku þátt. Einn af hverjum fjórum á heimsvísu segist hafa greitt mútur á síðastliðnu ári.

Þátttakendur voru meðal annars beðnir um að meta hversu mikil spilling viðgengist innan mismunandi þjóðfélagsstofnana þar sem einkunnin 1 merkti að viðkomandi stofnun væri óspillt og einkunnin 5 að hún væri gjörspillt. Stjórnmálaflokkar á Íslandi fengu einkunnina 4,3, Alþingi fékk 3,7, lögreglan 2,2, viðskiptalífið 4,0, fjölmiðlar 3,5, embættismenn 3,5, dómskerfið 2,7, almenn samtök 2,6, trúfélög 3,2 og menntakerfið fékk einkunnina 2,4.