Innlent

Segir gæfu að Landspítalinn sé í tveimur húsum

Hallgerður Kolbrún E. Jónsdóttir skrifar
Már Kristjánsson, yfirlæknir smitsjúkdómadeildar Landspítalans, ræddi við Heimi Má í Víglínunni í dag.
Már Kristjánsson, yfirlæknir smitsjúkdómadeildar Landspítalans, ræddi við Heimi Má í Víglínunni í dag. Stöð 2

„Verkefnin eru að aukast og róðurinn er að þyngjast inni á spítalanum en hafandi sagt það þá höfum við haft nógan tíma til þess að undirbúa okkur og við höfum fylgst gríðarlega vel með því sem hefur verið að gerast bæði úti í heimi og í okkar samfélagi,“ sagði Már Kristjánsson, yfirlæknir smitsjúkdómadeildar Landspítalans í Víglínunni í dag.

Hann sagði að spítalanum, sem er gömul og fastheldin stofnun, hafi verið umbylt á mjög stuttum tíma. „Þarna hafa allir komið að og lagst á árarnar, bæði stjórnendur, fagfólk, ólærðir, allir sem einn hafa lagst á árarnar að breyta starfsemi spítalans þannig það tali sem best við það sem er að gerast í samfélaginu og með það að markmiði að vernda sem mest okkar starfsemi innan spítalans.“

Þá sagði hann að ekki megi gleyma því að þó það sem sé að ske nú í samfélaginu sé alvarlegt að enn séu einstaklingar á spítalanum sem glíma við langvinn veikindi og spítalinn þurfi enn að sinna hlutverki sínu á sama tíma og hann er að glíma við þessa alheimsvá.

Búið er að skipta Landspítalanum upp í tvo hluta, annars vegar er það Landspítali í Fossvogi þar sem tekið verður á móti kórónuveikum sjúklingum, og hins vegar Landspítali við Hringbraut þar sem ekki verður tekið við kórónusmituðum sjúklingum vísvitandi.

„Það sem okkur hefur á sumum tímum þótt vera óhagræði að hafa starfsemina í tveimur húsum, hvað það í rauninni reynist okkur mikil lyftistöng í því að geta hagað okkar viðbragði á sem skynsamlegastan hátt núna,“ sagði Már. Hægt sé að flytja starfsemi sem áður hefur verið í Fossvogi á Hringbraut og brúkað Fossvogsspítala fyrir vánna sem nú herjar á samfélagið.

COVID göngudeildin skiptir sköpum

Þá sagið hann að verði fjöldi tilfella á versta veg miðað við svartsýnustu spár verði um 2.500 til 3.000 manns á hverjum tíma og 20 prósent þeirra þarfnist spítalavistar sem eru um 500 manns. Verstu tilfellin gætu þurft að leggjast inn á gjörgæslu og þurfa að fara í öndunarvél. „Það sem við erum hins vegar að sjá, miðað við svartsýnni spánna, þá erum við þar með tilliti til öndunarvélamálana.“

„Ef við lítum til fjölda þeirra sem eru innlagðir þá erum við ekki að sjá eins svartsýna tölu og svartsýnustu spár höfðu gert ráð fyrir,“ bætti hann við. „Ég held að það komi til, eða það eru spekúlasjónir hjá okkur, að með því að setja upp svokallaða COVID göngudeild sem er liður í þessari umbyltingu sem hefur orðið hjá okkur erum við að fylgja fólki eftir og áhættugreina það miðað við undirliggjandi sjúkdóma, aldur og líðan fólksins, þá hefur okkur tekist að forða innlögnum.“

Með tilkomu göngudeildarinnar hefur verið komið upp kerfi þar sem þeir sem smitaðir eru af veirunni geta verið heima í stað þess að leggjast inn á sjúkrahús en upplýsingaflæði er gott, heilbrigðisstarfsmenn hafa samband daglega og fólk hefur jafnvel „hitt“ heilbrigðisstarfsfólk í gegn um fjarfundabúnað. Þetta sagði Már mikilvægan lið í að sporna gegn frekari útbreiðslu veirunnar, enda lykilatriði að smitaðir komist ekki í snertingu við aðra.

„Markmiðið með þessu sem við erum að gera það er að halda fólkinu heima, þá nær það hvíld, það er ekki að útsetja aðra aðila og það er verið að fylgjast með því og þannig fær það fullvissu um það að það sé verið að hugsa um það og slær vonandi á ótta og angist,“ sagði Már. „Ef það sýnir merki þess að því er að versna þá er hægt að kalla það til á skipulagðan hátt, við skipulagðar kringumstæður og þar hittir það fólk sem er með allan varnarbúnað í lagi.“

Mikil gæfa að geta aðskilið COVID starfsemina frá annarri

Nýlega voru gögn birt frá Kína um batahorfur einstaklinga sem þurftu á öndunarvélum að halda og voru þau að Más sögn hræðileg. Yfir 90 prósent þeirra sem fóru í öndunarvélar áttu ekki afturkvæmt. Hann sagði þó þurfa að setja þetta í samhengi við aðstæður hér á landi.

„Í Kína var fólk tekið í bólinu vegna þess að þetta var í rauninni að gerast í þeirra samfélagi og það var í rauninni ekki viðbragð og þeir þurftu, eins og frægt er orðið, að byggja þarna bráðaspítala upp á 2.500 stæði á engri stundu. Ég held að þeir hafi misst af tækifærum, ég er ekki viss að þessar tölur endurspegli endilega raunveruleikann,“ sagði hann og varpaði fram þeirri spurningu hver okkar raunveruleiki væri.

„Við erum í mjög sérstakri stöðu, það er voða erfitt að ræða íslenskt heilbrigðiskerfi í samhengi við það sem er erlendis. Hér erum við með eitt stórt sjúkrahús í Reykjavík, við erum með minna sjúkrahús á Akureyri og þetta eru einu tveir staðirnir sem geta sinnt svona veiku fólki af einhverjum mæli. Við erum þeirrar gæfu aðnjótandi að geta aðskilið COVID starfsemi frá non-COVID starfsemi, að minnsta kosti eins og við erum að setja upp plönin.“

Búið er að skipuleggja starfsemina á Fossvogi vel og þar getur gjörgæslan sinnt tíu til ellefu manns hverju sinni og búið er að bæta við öndunarvélum á sjúkrahúsinu sem gefnar voru á sjúkrahúsið og eru nú til margir tugir öndunarvéla á sjúkrahúsinu. Már segist ekki sjá það fyrir að glímt verði við öndunarvélaþurrð á sjúkrahúsinu.


Tengdar fréttir

Ekki úti­lokað að inn­fluttar vörur hækki í verði

Ekki er útilokað að innfluttar vörur kunni að hækka í verði að sögn fjármálaráðherra í ljósi þess að blikur eru á lofti í efnahagsmálum og flugsamgöngur í lamasessi. Því sé tilvalið að styðja við íslenska framleiðslu að hans mati.

Efnahagsaðgerðir og ferðaþjónustan í Víglínunni

Bjarni Benediktsson, efnahags- og fjármálaráðherra, er fyrri gestur Víglínunnar í dag. Þá verður einnig rætt við Kristófer Oliversson, formann Fyrirtækja í hótel- og gistiþjónustu og eiganda og framkvæmdastjóra Center hótela. Báðir munu þeir ræða þá stöðu sem nú er uppi í þjóðfélaginu vegna kórónuveirufaraldursins sem nú geisar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×