Lineker, Wright og Shearer leita að besta fyrirliða sögunnar

Hver er besti fyrirliðinn í sögu ensku úrvalsdeildarinnar? Terry, Keane, Adams, Gerrard eða einhver annar? Nú geta knattspyrnuáhangendur hjálpað til að finna út úr því.

Gary Lineker, Alan Shearer og Ian Wright eru sérfræðingar í Match of The Day þættinum hjá breska ríkisútvarpinu og þeir hafa brugðist við ástandinu og fótboltaskortinum með því að setja af stað nýjan hlaðvarpsþátt.

Hlaðvarpsþátturinn heitir fullu nafni „Match of The Day: Top 10 podcast“ og fyrsta viðfangsefni félaganna var að ræða um bestu fyrirliðana í sögu ensku úrvalsdeildarinnar. Það má hlusta á þáttinn hér.

Tíu fyrirliðar voru tilnefndir og þeir Gary Lineker, Alan Shearer og Ian Wright röðuðu síðan bestu fyrirliðunum upp sjálfir. Breska ríkisútvarpið er líka að bjóða lesendum sínum að raða þeim upp eins og þeir telja rétt.

Liverpool, Manchester United og Arsenal eiga öll tvo fulltrúa en einn fulltrúi kemur svo frá Manchester City, Leicester, Newcastle og Chelsea.

Það vekur reyndar nokkra athygli að sérfræðingur Sky Sports, Gary Neville, kemst ekki inn á topp tíu listann en þar er samt Alan Shearer, einn af umsjónarmönnum þáttarins.

Fyrirliðarnir tíu sem koma til greina eru eftirtaldir:

Tony Adams, Arsenal

Steven Gerrard, Liverpool

Jordan Henderson, Liverpool

Roy Keane, Manchester United

Vincent Kompany, Manchester City

Wes Morgan, Leicester

Alan Shearer, Newcastle

John Terry, Chelsea

Nemanja Vidic, Manchester United

Patrick Vieira. Arsenal

Það er hægt að hafa áhrif á kosninguna með því að kjósa hér.