Fótbolti

Fyrir­liðinn segir íslenska liðið vel undir­búið og klárt í úr­slita­leikinn gegn Ung­verjalandi

Runólfur Trausti Þórhallsson skrifar
Aron Einar segir íslenska liðið einbeitt og tilbúið í leikinn gegn Ungverjum á fimmtudagskvöld.
Aron Einar segir íslenska liðið einbeitt og tilbúið í leikinn gegn Ungverjum á fimmtudagskvöld. Vísir/Hulda Margrét

Aron Einar Gunnarsson, fyrirliði íslenska landsliðsins í knattspyrnu, ræddi við Henry Birgi Gunnarsson fyrir leikinn mikilvæga gegn Ungverjum sem fram fer á fimmtudagskvöld. Sker leikurinn úr um hvort landið kemst á Evrópumótið næsta sumar.

Sigurvegarinn verður í sannkölluðum dauðariðli en ásamt Íslendingum, eða Ungverjum, verða heimsmeistarar Frakka, Evrópumeistarar Portúgals og að lokum Þjóðverjar.

Sjá má viðtalið í heild sinni í spilaranum neðst í fréttinni.

Varðandi undirbúninginn fyrir leikinn

„Við erum ekkert að reyna láta hluti sem við getum ekki breytt hafa áhrif á okkur. Við erum að einblína á þennan leik. Leyfum KSÍ og starfsfólkinu að sjá um hitt. Leikmennirnir eru klárir, okkur líður vel hérna í Augsburg [í Þýskalandi, þar sem íslenska liðið undirbýr sig fyrir leikinn], það er hugsað vel um okkur og við erum búnir að undirbúa okkur vel fyrir þennan leik.“

„Erum búnir að fara yfir þá mikið, á myndbandsfundum og æfingum. Vorum að klára taktíska æfingu núna sem gekk vel. Við erum vel undirbúnir og tilbúnir í þetta,“ sagði fyrirliðinn um undirbúninginn fyrir þennan mikilvæga leik.

Varðandi spennustigið og anda íslenska liðsins

„Auðvitað, maður finnur fyrir spennu og tilhlökkun. Búnir að bíða lengi eftir þessum leikjum, bæði Rúmeníu leiknum og þessum. Mér finnst undirbúningurinn búinn að vera góður og við erum reynslumiklir. Við kunnum á þessa leiki. Ég tel að það eigi eftir að vera bónus fyrir okkur, að vita hvað við erum að fara út í.“

„Vissulega vitum við hversu sterkir Ungverjarnir eru, það er kraftur í þeim og mikill hraði. Þurfum að nýta okkur okkar reynslu, hvernig við spilum þennan leik og leggjum hann upp. Við erum búnir að fara vel yfir það og það ætti í rauninni ekkert að koma okkur á óvart með þeirra leikskipulag og hvernig þeir spila, það er svolítið auðvelt að lesa það en þeir eru góðir í því sem þeir eru góðir í, það er alveg klárt,“ sagði Aron Einar um spennustigið í íslenska hópnum en um algjöran úrslitaleik er að ræða.

Er eitthvað utanaðkomandi að trufla eða er öll einbeiting á leiknum?

„Við erum ekkert að pæla í því. Við einbeitum okkur að leiknum, leyfum KSÍ og öðru fólki að hugsa um hvað er mikið undir peningalega séð og annað. Það er undir okkur komið að framkvæma hlutina á vellinum og við þurfum að mæta af fullum krafti í þennan leik, vera skipulagðir og nýta okkar reynslu. Erum ekkert að hugsa um svona hluti of mikið því það gæti truflað mannskapinn og liðið ef menn eru að pæla of mikið í því.“

„Eins og ég sagði áðan þá erum við vanir þessum stóru leikjum sem skipta máli fyrir sambandið og félögin í landinu. Það er undir okkur komið að standa okkur og gera vel inn á vellinum,“ sagði fyrirliðinn að lokum við Henry Birgi.

Klippa: Aron Einar segir Ísland vel undirbúið og klárt í úrslitaleikinn gegn Ungverjalandi

Leikur Ungverjalands og Íslands verður sýndur í beinni útsendingu á Stöð 2 Sport 2 fimmtudaginn 12. nóvember klukkan 19.45 en upphitun hefst klukkan 18.45. Áskrift er hægt að kaupa hér en einnig verður í boði að kaupa stakan viðburð á myndlyklum Vodafone og Símans á kr. 990, sem og í vefsjónvarpi Stöðvar 2.


Tengdar fréttir

Segir markvörð Ungverja í heimsklassa

Gunnleifur Gunnleifsson, fyrrverandi landsliðsmarkvörður, hrósar lykilmanni Ungverja í hástert í viðtali fyrir úrslitaleik Ungverjalands og Íslands um sæti á EM í fótbolta.

Uppselt á Ungverjaleikinn en enginn mætir

Þeir 20 þúsund miðar sem settir voru í sölu á úrslitaleik Ungverjalands og Íslands, um sæti á EM karla í fótbolta, seldust fjótt upp. Nú er hins vegar ljóst að engir áhorfendur verða á leiknum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.