Fótbolti

3 dagar í Ungverjaleik: Höddi Magg tryggði okkur síðast sigur í Búdapest

Óskar Ófeigur Jónsson skrifar
Hörður Magnússon skoraði þetta eftirminnilega sigurmark íslenska landsliðsins fyrir rúmum 28 árum síðan.
Hörður Magnússon skoraði þetta eftirminnilega sigurmark íslenska landsliðsins fyrir rúmum 28 árum síðan. Samsett/Vilhelm/Skjámynd/Youtube

Íslenska karlalandsliðið þarf að gera það á fimmtudaginn kemur sem liðinu hefur aðeins einu sinni tekist áður eða að fagna sigri á Ungverjum í Búdapest.

Í dag eru þrír dagar í úrslitastund hjá strákunum okkar í karlalandsliðinu í fótbolta en 12. nóvember næstkomandi kemur í ljós á Ferenc Puskás leikvanginum í Búdapest hvort það verður Ungverjaland eða Ísland sem spilar í lokakeppni Evrópumótsins í sumar. Leikur verður í beinni á Stöð 2 Sport og spennan magnast með hverjum deginum. Vísir heldur áfram að telja niður í leikinn.

Það þarf að fara alla leið aftur til júnímánaðar 1992 til að finna síðasta skiptið sem A-landslið karla í knattspyrnu fagnaði síðast sigri í Búdapest.

„Heyra hefði mátt saumnál detta á Nep-leikvanginum, þegar Hörður Magnússon skoraði sigurmark, 2:1, Íslands gegn Ungverjalandi í Búdapest í gærkvöldi,“ var fyrirsögnin hjá Steinþóri Guðbjartssyni í Morgunblaðinu daginn eftir.

Baksíða Morgunblaðsins eftir leikinn.Skjámynd/Timarit.is/Morgunblaðið 4. júní 1992

Ungverjar fengu draumabyrjun í leiknum þegar Kálmán Kovács kom þeim í 1-0 strax á 2. mínútu leiksins. Þannig var staðan þar til á 51. mínútu þegar Þorvaldur Örlygsson jafnaði metin í 1-1. Þorvaldur fékk þá sendingu inn fyrir vörnina frá Sigurði Grétarssyni og lyfti boltanum yfir markvörðinn og í markið.

Þrettán mínútum síðar fór fyrirliðinn Sigurður Grétarsson af velli og Hörður Magnússon kom inn á fyrir hann. Hörður var þarna búinn að vera markakóngur efstu deildar á þremur tímabilum í röð en hafði ekki skorað fyrir landsliðið í fyrstu sex leikjum sínum.

Hörður var réttur maður á réttum stað níu mínútum síðar þegar hann fylgdi eftir þegar skutluskalli Rúnars Kristinsson var varinn. Hörður þrumaði frákastinu eftirminnilega upp í þaknetið á marki Ungverja.

Opna DV daginn eftir leikinn.Skjámynd/Timarit.is/DV 4. júní 1992

Rúnar átti annars frábæran leik á miðju íslenska liðsins og átti stóran þátt í báðum mörkunum.

„Þetta er draumi líkast og ég trúi því ekki enn að við höfum unnið leikinn, hvað þá að ég hafi skorað sigurmarkið. Gústaf Björnsson aðstoðarþjálfari sagði við mig þegar ég var að gera mig kláran fyrir skiptinguna: „Nýttu sénsinn þinn." Þetta var fyrsta markið mitt fyrir íslenska landshðið, Ásgeir Elíasson hefur haft trú á mér og vonandi hef ég sýnt að ég eigi heima í landsliðinu," sagði Hörður Magnússon við Guðmund Hilmarsson á DV eftir leikinn.

Í viðtali við Morgunblaðið þá talaði Hörður um að bernskudraumurinn hans hafi þarna orðið að veruleika.

„Í Grikklandi kom ég inn á, þegar 15 mínútur voru eftir og það var of stutt, en nú fékk ég hálftíma, sem var betra. Það var þægilegt að koma inn á í þessari stöðu, því við vorum að komast inn í leik inn og möguleikinn var fyrir hendi. Helsti styrkleiki minn er að nýta skyndisóknir og við beittum þeim reglulega," sagði Hörður í viðtali við Morgunblaðið eftir leikinn en um um sigurmarkið sagði hann: „Ég trúði þessu ekki. Draumurinn sem smápatti var að komast í landslið og gera sigurmarkið að viðstöddum þúsundum, en þetta er engu líkt. Draumurinn hefur nú ræst."

Þetta reyndist vera eina markið sem Hörður Magnússon skoraði fyrir íslenska landsliðið og er líka í eina skiptið sem íslenska karlalandsliðið í knattspyrnu hefur fagnað sigri í Búdapest.

Leikurinn fór fram á Népstadion sem er ekki til í dag en leikurinn á fimmtudaginn fer þó fram á sama stað. Leikvangurinn var rifinn árið 2017 og í stað hans byggðu Ungverjar nýjan og glæsilegan þjóðarleikvang sem fékk nafnið Ferenc Puskás Stadium. Þar spila strákarnir okkar eftir aðeins þrjá daga.

Leikur Ungverjalands og Íslands verður sýndur í beinni útsendingu á Stöð 2 Sport 2 fimmtudaginn 12. nóvember klukkan 19.45 en upphitun hefst klukkan 18.45. Áskrift er hægt að kaupa hér en einnig verður í boði að kaupa stakan viðburð á myndlyklum Vodafone og Símans á kr. 990, sem og í vefsjónvarpi Stöðvar 2.


Tengdar fréttir




Fleiri fréttir

Sjá meira


×