Van de Beek sagður í læknisskoðun í Manchester

Donny Van de Beek, miðjumaður Ajax, er sagður vera í Manchester þar sem hann er sagður í læknisskoðun hjá Man. United.

Hinn virti ítalski blaðamaður, Fabrizio Romano, greinir frá þessu á Twitter síðu sinni í dag en hann er talinn afar áreiðanlegur.

Van de Beek hefur verið orðaður við Man. United síðustu daga en þessi 23 ára miðjumaður virðist nú vera semja við þá rauðklæddu í Manchester borg.

Miðjumaðurinn sló sérstaklega í gegn tímabilið 2018/2019 er Ajax fór ansi langt í Meistaradeildinni og var m.a. Real Madrid sagt á eftir kappanum.

Nú er hann talinn á leið til Manchester og verður hann þar af leiðandi fyrsti leikmaðurinn sem Ole Gunnar Solskjær kaupir á leikmannamarkaðnum í sumar.

Solskjær og van de Beek hafa nú þegar rætt saman og Hollendingurinn er spenntur að byrja að spila fyrir félagið.