Yrsu sárnaði gagnrýni Kolbrúnar og Páls Baldvins

Yrsu Sigurðardóttur sárnaði gagnrýni Kolbrúnar Bergþórsdóttur og Páls Baldvins Baldvinssonar á nýjustu bók hennar Brakinu í Kiljunni fyrir jól.

Yrsa prýðir forsíðu Nýs lífs sem kemur út á fimmtudag en í blaðinu svarar hún bókmenntagagnrýnendum Kiljunnar fullum hálsi og segist efast um þeirra dóma á glæpasögum.

"Allt sem þau sögðu um mig var svo hrikalega neikvætt að ég varð orðlaus. Þau efuðust meira að segja um söluna á bókinni og að sölulistarnir væru réttir. Hvað með öll hin árin sem þessir listar hafa verið birtir? Mér fannst þau ekki sanngjörn."

Brakið var söluhæsta bók síðasta árs og í fyrsta sinn fór Yrsa upp fyrir Arnald Indriðason á sölulistum.

Hún segir einnig frá því að Bragi Kristjónsson bóksali hafi sent henni kveðju til að þakka henni fyrir hrylllilega flott skrif. Kveðjunni hafði Yrsa ekki komist í að svara en nokkrum dögum síðar hafi Bragi rakkað Yrsu niður í viðtali við Pressuna.

Í viðtalinu í Nýju lífi lýsir Yrsa einnig tvöföldu lífi sínu sem hverfist um jarðvarmavirkjanir á verkfræðistofunni Verkís og morðsögur sem fæðist í sófanum heima á kvöldin.