Ákvörðun um hvalveiðar óskiljanleg

Samtök ferðaþjónustunnar lýsa yfir miklum vonbrigðum með að ákvörðun Einars K. Guðfinnsonar, fyrrverandi sjávarútvegsráðherra, um veiðar á hrefnu og langreyði skuli standa. Samtökin segja hana óskiljanlega.

Þegar litið er til gríðarlegrar andstöðu alþjóðasamfélagsins við hvalveiðar er ákvörðun um umfangsmiklar hvalveiðar óskiljanleg á sama tíma og við þurfum að endurreisa ímynd Íslands eftir efnahagshrunið, að mati Samtaka ferðaþjónustunnar.

,,Í þeim efnahagsþrengingum sem eru víðast hvar í viðskiptalöndum okkar munu ferðalög fólks dragast saman og enn meiri barátta verða um hylli ferðamannsins og eru nágrannaþjóðir að verja miklum fjármunum í markaðsmál. Við það verður Ísland að berjast. Ferðaþjónusta er ein þriggja stoða í gjaldeyrissköpun þjóðarbúsins sem þarf nú á meiri tekjum að halda en nokkru sinni fyrr. Það er því undarlegt að stjórnvöld skuli leggja stein í götu þeirrar atvinnugreinar sem einna mest er horft til á þessum tímum," segir í tilkynningu frá samtökunum.