Alífuglar bólusettir í Kína

Kínversk stjórnvöld hafa ákveðið að bólusetja þrjár milljónir alífugla í Quinghai-héraði í vesturhluta landsins eftir að næstum 200 gæsir fundust þar dauðar líklega að völdum fuglaflensu. Enn hefur þó enginn maður látist vegna fuglaflensu í Kína. Víetnömsk stjórnvöld tilkynntu í gær um 54. fuglaflensudauðsfallið í Asíu hingað til. Enn hefur þó ekki verið sýnt fram á að smit geti borist á milli manna heldur hafa allir þeir sem hingað til hafa látist sennilega komist í samband við sýkt fuglakjöt. Engu að síður varar Alþjóðaheilbrigðisstofnunin við því að sýkingin geti breyst þannig að hún berist á milli manna. Þetta eru Kínverjar einmitt hræddir við og hafa því gripið til þessara aðgerða. Varaforsætisráðherra Kína aflýsti mikilvægum fundi með forsætisráðherra Japan vegna "ótilgreindra aðstæðna heima fyrir", líklega vegna þess að nú á sem mest starfsorka kínverksra stjórnvalda að fara í það að berjast gegn fuglaflensunni.