Eiginmaðurinn sagður halda framhjá Carrie Bradshaw

Hið stórskemmtilega tímarit Star Magazine segir frá því að Matthew Broderick eiginmaður leikkonunnar Söruh Jessicu Parker hafi haldið framhjá henni upp á síðkastið. Viðhaldið mun vera 25 ára gömul rauðhærð stúlka sem starfar sem unglingaráðgjafi.

Tímaritið segir að Borderick hafi hitt stúlkuna sem er næstum helmingi yngri en hann, fyrr á þessu ári. Hittust þau á bar og fljótlega hófust miklar sms-sendingar þeirra á milli.

Vinur stúlkunnar segir mikinn hita vera á milli hennar og hins harðgifta leikara.

Sara Jessica sem er hvað þekktust fyrir hlutverk sitt sem Carrie Bradshaw í þáttunum, Beðmál í borginni, hefur ekki þurft að glíma við svona lagað í einkalífinu áður. Carrie er hinsvegar sífellt að velta fyrir sér hvort Mr. Big sé henni trúr.