Upplýsingar um leiguverð verða birtar mánaðarlega

Þjóðskrá Íslands birtir í fyrsta sinn á morgun upplýsingar um húsaleigu eftir staðsetningu og stærðarflokkum fasteigna á landinu og hyggst hér eftir birta mánaðarlega leiguverð og vísitölu leiguverðs á höfuðborgarsvæðinu. Í sameiginlegri tilkynningu frá stofnununum segir að á síðustu mánuðum hafi verið haft samstarf um skráningu upplýsinga um leiguverð úr þinglýstum leigusamningum. Hingað til hafi Þjóðskrá aðeins birt upplýsingar um fjölda leigusamninga sem þinglýst er í hverjum mánuði en samkomulag við Íbúðalánasjóð um kostun skráningar gerir kleift að skrá líka fjárhæð húsaleigu, staðsetningu og eiginleika fasteignar.

„Lokið er skráningu á öllum þinglýstum leigusamningum um íbúðarhúsnæði frá 1. janúar 2011. Upplýsingar úr þessum gögnum verða birtar í töflu sem sýnir meðalleiguverð eftir staðsetningu og stærðarflokkum fasteigna og birt verður vísitala fyrir leiguverð á höfuðborgarsvæðinu."

„Þjóðskrá Íslands hefur um nokkurt skeið haft áhuga á að safna með kerfisbundnum hætti upplýsingum um leiguverð íbúðarhúsnæðis, líkt og gert hefur verið fyrir kaupverð. Markmið skráningarinnar er að treysta undirstöðu fasteignamats og efla upplýsingagjöf um leigumarkað. Með samningi við Íbúða­lánasjóð um að sjóðurinn kosti uppsetningu leiguskráningarkerfis og skráningar þinglýstra leigusamninga 2011 og 2012 verður þetta verkefni að veruleika. Hér eftir mun Þjóðskrá birta mánaðarlega upplýsingar um leiguverð. Von okkar er að með því aukist gegnsæi og skilvirkni á þessum mikilvæga markaði," segir Haukur Ingibergsson forstjóri Þjóðskrár Íslands.

„Íbúðalánasjóður er einn helsti lánveitandi til leigufélaga íbúðarhúsnæðis og hefur veitt lán til um ellefu þúsund leiguíbúða. Sökum yfirstandandi efnahagsþrenginga hefur sjóðurinn að auki eignast um 700 fasteignir sem hann leigir út. Með vinnslu þinglýstra leigusamninga er kominn traustur grunnur fyrir greiningar Íbúðalánasjóðs á rekstrarforsendum þeirra leigufélaga sem sjóðurinn lánar. Að mati Íbúðalánasjóðs hefur skortur á áreiðanlegum leiguverðsupplýsingum lengi staðið leigumarkaði fyrir þrifum. Því var gengið til samvinnu við Þjóðskrá Íslands um að færa þetta til betri vegar. Þetta samstarf um upplýsingaöflun á húsnæðismarkaði er mikilvægur þáttur í hlutverki Íbúðalánasjóðs og styður við frekari greiningarvinnu sjóðsins á sviði húsnæðismarkaðar. Áreiðanlegar upplýsingar um leiguverð koma landsmönnum öllum til góða," segir Sigurður Erlingsson framkvæmdastjóri Íbúðalánasjóðs.