Talsverður áhugi á listaverkum eftir Sævar Cieselski

Málverk eftir Sævar Cieselski er nú á vefuppboði hjá Gallerí Fold. Verkið er selt ásamt verkum nokkura þekktustu listamanna landsins en vefuppboðin hafa gefið nýjum og óþekktum listamönnum tækifæri.

Gallerí Fold byrjaði fyrir tæpu ári síðan að halda uppboð á netinu, þar geta áhugasamir kaupendur skoðað málverk og listmuni og boðið í rafrænt. Uppboðin standa í tíu daga og hafa viðtökurnar verið góðar.

„Það eru nýjir viðskiptavinir, það er fullt af fólki sem hefur aldrei boðið áður og það kemur síðan á hefðbundin uppboð það kviknar áhugi hjá þeim," segir Jóhann Ágúst Hansen, listmunasali.

Nýjasta uppboðið hófst um helgina og er þar að finna verk eftir marga þekkta listamenn svo sem Louisu Matthíasdóttur og Ásgrím Jónsson en einnig óþekktari listamenn svo sem Sævar Cieselski einn af sakborningunum í Geirfinnsmálinu sem lést af slysförum í Danmörku á síðasta ári.

„Hann var að vinna með airbrush tækni og myndi vera skilgreindur sem áhugamálari, var ekki lærður myndlistarmaður eða þess háttar," segir Jóhann Ágúst.

Sævar málaði nokkur verk segir Jóhann en þetta er í fyrsta sinn sem verk hans er boðið á uppboði og viðtökurnar hafa verið góðar.

„Um leið og uppboðið fór í loftið, á netinu, þá komu boð í það alveg frá fyrstu mínútu, það er komið þrjátíu þúsund núna sem er hærra en margir þekktari listamenn eru með," segir Jóhann Ágúst. Aðspurður hvort það sé nafnið sem heilli svarar Jóhann: „Ég held það, það er held ég frekar nafnið heldur en gæði listaverksins."