Refsing árásarmanns þyngd um sex mánuði

Hæstiréttur dæmdi í dag karlmann í 15 mánaða óskilorðsbundið fangelsi fyrir líkamsárás. Héraðsdómur hafði áður dæmt manninn í níu mánuði en þar af voru sex mánuðir skilorðsbundnir til þriggja ára. Maðurinn var einnig ákærður fyrir tilraun til nauðgunar.

Í frumskýrslu lögreglunnar sem tekin var af konunni er haft eftir henni að hún hafi verið að koma heim af dansleik þegar fyrrverandi eiginmaður hennar og barnsfaðir, ákærði í málinu, hafi hringt dyrabjöllu og hún boðið honum inn. Að sögn konunnar hafi ákærði verið rólegur, þau ræðst við í sófa í stofunni og hann viljað hafa samfarir við hana. Hún hafi hafnað þeirri ósk, hann reiðst, tekið taubelti af buxum sínum, sett það um háls hennar og hert að. Í framhaldi hafi hann klætt þau bæði úr buxum og nærbuxum og reynt að nauðga henni, fyrst með því að leggjast ofan á hana í sófanum, en síðan með því að draga hana með beltinu niður á stofugólf og leggjast ofan á hana þar. Kvaðst konan hafa náð að bíta ákærða. Hún sagði hann hafa haldið beltinu um háls hennar í 20-30 mínútur, en ekki náð að eiga við hana samræði. Hann hafi síðan losað beltið og farið á brott.

Hvorki héraðsdómi né Hæstarétti þótti ákæruvaldinu hafa tekist að færa sönnur á það að maðurinn hafi nauðgað konunni. Gunnlaugur Claessen, Árni Kolbeinsson, Garðar Gíslason, Ingibjörg Benediktsdóttir og Markús Sigurbjörnsson dæmdu málið í Hæstarétti. Ingibjörg skilaði sératkvæði og sagðist ósammála niðurstöðu meirihluta dómenda um að sýkna ákærða af tilraun til nauðgunar.