Síld og ýsa bakvið aflaaukningu

Heildarafli íslenskra fiskiskipa í október jókst um 2% á föstu verði samanborið við október í fyrra. Heildaraflinn jókst um tæp 8.000 tonn og varð 98.264 tonn skv. bráðabirgðatölum frá Hagstofunni.

Botnfiskaflinn í heild dróst saman um 2.800 tonn. Samdráttur í þorskafla var rúm 3.600 tonn en ýsuaflinn jókst hins vegar um 3.100 tonn. Mestu munar um næstum 15.000 tonna aukningu í síldarafla. Heildarafli, að síldinni frátalinni, dróst saman um næstum 7.000 tonn frá október í fyrra.

Fjallað er um málið í Vegvísi Landsbankans og þar segir m.a. að frá áramótum hefur heildarafli aukist um 68.527 tonn miðað við 2006 og er nú orðinn 1.214 m.tonn en að baki þeirri tölu liggja talsverðar breytingar í aflasamsetningu. Mestu munar um næstum 77.000 tonna samdrátt í kolmunnaafla, rúmlega 123.000 tonna aukningu í loðnuafla og 32.000 tonna aukningu í öðrum uppsjávarafla.