Skýrarir reglur til þess að meta veikindi ökumanna

Rannsóknarnefnd umferðarslysa vill að yfirvöld setji sérstækar reglur fyrir lækna til þess að þeir geti komið í veg fyrir að fólk sem er langt leitt af sjúkdómum eða af notkun tiltekinna lyfja setjist undir stýri.

Ágúst Mogensen, forstöðumaður Rannsóknarnefndar umferðarslysa, bendir á að samgönguráðherra og landlækni sé heimil í sameiningu að endurskoða þessi mál samkvæmt lögum.

Hann segir að í lögum og reglum séu þær heilsufarskröfur sem gerðar séu til ökumanna. „Hins vegar vantar upp á klínískar leiðbeiningar til lækna um það hvenær sé rétt að fólk keyri ekki lengur," segir Ágúst. Hann bendir enn fremur á að af þeim 13 tilvikum, þar sem rekja megi dauðsföll í umferðinni til veikinda ökumanna, hafi ellefu ökumannanna verið í meðferð hjá lækni. „Svo eru nokkur tilvik á undanförnum árum þar sem fólk hefur látist undir stýri. Í sumum þeirra var fólkið langt leitt af alvarlegum sjúkdómum," segir Ágúst.

Ágúst segir ljóst að ekki verði hægt að koma í veg fyrir öll slys af þessu tagi en menn hljóti að velta fyrir sér hvar sé hægt að gera betur. Þekkingin á sjúkdómum og lyfjum sé svo sannarlega fyrir fyrir hendi.

Fólk taki meðvitaða ákvörðun um að hætta að aka

Ágúst bendir enn fremur á að leiðbeiningar sem þessar séu til í Kanada. Landlæknisembættið hafi tekið þær upp en þær hafi ekki lagagildi. „Við viljum því nákvæmar útlistanir á því hvenær læknir eigi að grípa inn í og að þær útlistanir hafi eitthvert vægi," segir Ágúst. Hann segir að rannsóknarnefndin vilji með skýrslu sinni einnig vekja fólk til umhugsunar þannig að það taki jafnvel meðvitaða ákvörðun um að hætta að aka vegna veikinda, lyfjanotkunar eða aldurs.

Rannsóknarnefndin hefur þegar sent skýrsluna til samgönguráðuneytisins og landlæknis ásamt bréfi og segir Ágúst að nefndin muni fylgjast með því hvort eitthvað verði gert í málunum.