Meinbugir á íslenskri löggjöf

Umboðsmaður Alþingis finnur fleiri meinbugi á íslenskri löggjöf en umboðsmenn löggjafasamkoma annarra nágrannaþjóða. Málum hjá umboðsmanni hefur fjölgað um 16 prósent á þessu ári miðað við síðasta ár.

Alþingi hefur tekið upp ný vinnubrögð við afgreiðslu árlegrar skýrslu Umboðsmanns Alþingis til þingsins. Nú fer allsherjarnefnd Alþingis yfir skýrsluna og á fundi með Umboðsmanni og nefndin skilar síðan áliti sínu á skýrslunni til Alþingis. Birgir Ármannsson formaður allsherjarnefndar vakti athygli á því í umsögn sinni um skýrsluna í morgun að eitt af verkefnum Umboðsmanns væri að vekja athygli á meinbugi í lagasetningu.

Birgir sagði að skýrsla Umboðsmanns leiddi í ljós að algengara væri að meinbugir væru á löggjöf á Íslandi en í næstu nágrannalöndum.

Almennt sagði Birgir að skýrsla umboðsmanns sýndi þó að mál færðust til betri vegar. Umboðsmaður sendi frá sér 179 álit í fyrra en í 12,3 prósentum þeirra mála taldi umboðsmaður meinbugi vera á lögum. Málum hjá umboðsmanni fækkaði um 15 prósent árið 2006 miðað við árið 2005.

Birgir sagði að tölur ársins í ár leiddu hins vegar í ljós að þessi fækkun hefði gengið til baka og það sem af væri ári væru mál á borði Umboðsmanns 16 prósent fleiri nú en á sama tíma í fyrra.

Kolbrún Halldórsdóttir þingmaður Vinstri grænna varð fyrir vonbrigðum með álit allsherjarnefndar á skýrslu umboðsmanns og sagðist hafa átt von á meira kjöti á því beini. Alþingismenn hlustuðu á athugasemdir Umboðsmanns og ræddu þær, en gerðu svo ekkert í málinu.