Upplýsingar sem fengust eftir fjölmiðlaumfjöllun voru ástæða húsleitar

Samkeppniseftirlitið segir að upplýsingar frá einstaklingum og fyrirtækjum sem bárust í kjölfar fjölmiðlaumfjöllunar um matvörumarkaðinn, nú um daginn, hafi leitt til þess að húsleit var gerð hjá tveimur aðilum í smásölu og þremur aðilum í innflutningi og heildsölu í dag.

„Í fréttatilkynningu 1. nóvember sl. hvatti Samkeppniseftirlitið þá sem teldu sig hafa upplýsingar um brot á samkeppnislögum til þess að koma þeim upplýsingum á framfæri við eftirlitið og hafa allmargir brugðist við þeirri hvatningu.

Rannsókn sú sem nú er hafin beinist einkum að ætluðum brotum á 10. gr. samkeppnislaga, þ.e. hugsanlegu ólögmætu samráði smásöluaðila og birgja. Kemur rannsóknin til viðbótar við aðrar athuganir sem nú standa yfir og áður hafa verið kynntar opinberlega. Samkeppniseftirlitið mun hraða nýhafinni rannsókn eftir því sem kostur er, en ljóst er að athugunin er viðamikil og að nokkurn tíma mun taka að greina þau gögn sem aflað hefur verið," segir í tilkynningu frá Samkeppniseftirlitinu. Liðsinni fyrirtækja hefur áhrif á málsmeðferð

„Rétt er að vekja athygli á því að þýðingu hefur fyrir skjóta úrlausn málsins hvort fyrirtæki eða einstaklingar ákveða að liðsinna eftirlitinu við rannsókn þess. Ef um brot er að ræða getur Samkeppniseftirlitið samkvæmt lögum fallið frá sektarákvörðun hafi fyrirtæki verið fyrst til að láta því í té upplýsingar eða gögn vegna ólögmæts samráðs sem geta leitt til sönnunar á broti.

Einnig er heimilt að lækka sektir ef fyrirtæki liðsinna eftirlitinu með því að veita mikilvæg sönnunargögn. Þá getur Samkeppniseftirlitið ákveðið að kæra ekki til lögreglu hugsanleg brot einstaklinga sem upplýsa um þau og liðsinna við rannsókn. Fyrirtæki og einstaklingar sem hugsanlega hafa tekið þátt í ólögmætu samráði hafa því skýran hag af því að liðsinna eftirlitinu, en það getur á móti leitt til skjótari málsmeðferðar," samkvæmt tilkynningu frá Samkeppniseftirlitinu," segir ennfremur í tilkynningunni

Vísir.is hefur ekki náð tali af Páli Gunnari Pálssyni, forstjóra Samkeppniseftirlitsins, vegna rannsóknarinnar.