Viðsnúningur hjá sveitarstjórn Flóahrepps

Sveitarstjórn Flóahrepps ákvað á fundi sínum í gær að auglýsa tillögu að aðalskipulagi fyrrum Villingaholtshrepps þar sem gert er ráð fyrir Urriðafossvirkjun. Þetta er þvert á það sem sveitarstjórnin ákvað í sumar en í drögum að aðalskipulagi sem þá voru kynnt var var ekki gert ráð fyrir virkjuninni.

Tíðindin í sumar komu Landsvirkjunarmönnum, sem hyggjast reisa virkjunina, á óvart og hafa staðið yfir viðræður á milli sveitarstjórnarinnar og fyrirtækisins um móvægisaðgerðir vegna virkjunarinnar.

Sveitarstjórnin hélt í júní í sumar kynningarfund fyrir íbúa þar sem kynntar voru tvær tillögur að aðalskipulagi, önnur með virkjun og hin án hennar. Sveitarstjórnin ákvað svo að fresta því að taka ákvörðun um aðalskipulagið um óákveðinn tíma á meðan unnið væri áhættumat vegna virkjunarinnar og viðræður við Landsvirkjun um mótvægisaðgerðir yrðu til lykta leiddar.

Áhættumatið var kynnt í síðasta mánuði en í því kemur fram að ef stífla Urriðafossvirkjunar brestur sé hætta á að flóð breiðist út afar takmörkuð og að Þjórsá haldist að mestu í farvegi sínum.

Viðræðum við Landsvirkjun um mótvægisaðgerðir er einnig lokið en þar er meðal annars gert ráð fyrir að fyrirtækið kosti lögn nýrrar aðveitu vatnsveitu sveitarfélagsins, að vegakafli um sveitarfélagið að Gaulverjabæ verði endurbyggður, að aðstaða fyrir ferðamenn verði byggð upp í landi Þjótanda þar sem virkjanir á vatnasviði Þjórsár verða kynntar, gripið verði til mótvægisaðgerða vegna lífríkis Þjórsár og að GSM-símakerfi sveitarfélagsins verði endurbætt.

Sveitarstjórn Flóahrepps samþykkti samhljóða að auglýsa tillögu að aðalskipulagi fyrrum Villingaholtshrepps með Urriðafossvirkjun en bendir á að ákvörðunin feli ekki í sér ákvörðun um framkvæmdaleyfi vegna Urriðafossvirkjunar. Þá leggur sveitarstjórn áherslu á að Landsvirkjun nái samningum við landeigendur verði af fyrirhugaðri virkjun eftir því sem segir á vef sveitarfélagsins.

Urriðafossvirkjun er sú stærsta af þremur virkjunum sem Landsvirkjun áformar í neðri hluta Þjórsár, 125 megavött af afli. Henni fylgir jafnframt stærsta uppistöðulón þessara virkjana, nefnt Heiðarlón.