Gera mynd um ættföður Thorsaranna

Danir og Íslendingar vinna sameiginlega að gerð heimildarmyndar um lífshlaup Thors Jensen, langafa Björgólfs Thors Björgólfssonar. Thor flutti til Íslands frá Danmörku á táningsaldri og byggði hér upp mikið viðskiptaveldi.

Það er hin danska Ulla Rasmussen sem leikstýrir myndinni um hann en Hrönn Kristinsdóttir er einn af framleiðendum hennar. „Þetta er fyrst og fremst mynd um ævi Thors, en ekki um afkomendur hans. Þannig að þetta verður svolítið frábrugðið bókinni sem kom út fyrir nokkrum árum," segir Hrönn.

Hrönn segir að fjallað verði um lífshlaup Thors á Íslandi og rætt við þá sem þekktu hann. Hún segir að búið sé að taka hluta myndarinnar upp og myndin verði vonandi tilbúin með vorinu. „Ríkissjónvarpið mun sýna myndina, en þeir fjármagna gerð hennar ásamt Kvikmyndasjóði Íslands, Danska Ríkisútvarpinu og dönskum kvikmyndasjóð," segir Hrönn.

Upphaflega stóð til að Guðný Halldórsdóttir kæmi að leikstjórn myndarinnar en að hennar sögn hefur Ulla Rasmussen tekið verkefnið alfarið yfir.