Stefndu lífi samborgara sinna í hættu

Þrír ökumenn undir áhrifum fíkniefna ollu óskunda í umferðinni á höfuðborgarsvæðinu í nótt og stefndu lífi samborgaranna í bráða hættu.

Fyrst missti ökumaður stjórn á BMW-bíl sínum á ofsahraða þannig að hann plægði þversum upp umferðareyju á löngum kafla uns hann lenti á lenti á bensíndælum á bensínstöðinni á mótum Langholtsvegar, Kleppsvegar og Sæbrautar um eittleytið í nótt.

Við höggið snarsnerist bíllinn af miklu afli og hafnaði hann aftur á bak hálfur inn í verslun stöðvarinnar þar sem hann nam loks staðar. Rétt áður hafði hann ekið niður umferðarskilti sem þeyttist upp í skyggnið fyrir ofan bensínplanið. Ökumaðurinn og farþegi hans sluppu lítið meiddir en slökkvilið var kvatt á vettvang til öryggis vegna eldhættu.

Ökumaðurinn reyndist vera undir áhrifum fíkniefna. Lögregla lokaði vettvanginn af en þá var bíl ekið í gegn um lokunina og á mikilli ferð til vesturs. Lögreglumönnum á nokkrum bílum tókst að króa hann af á Dalbraut og reyndist hann líka undir áhrifum fíkniefna.

Sama átti við um ökumanninn sem velti bíl sínum um svipað leyti við Gufunesveg eftir vítaverðan akstur að sögn vitna og fjórði ökumaðurinn, sem stöðvaður var á Borgarvegi hafði líka neytt fíkniefna.