Orkuvinnslusvæði verði alfarið í eigu almennings

Sveitarfélögin Vogar, Hafnarfjörður og Grindavík hafa stofnað með sér félag til þess að tryggja að framtíðarorkuvinnslusvæði á Reykjanesi verði alfarið í eigu almennings í sveitarfélögunum.

Þetta er meðal annars get með hliðjsón af því að iðnaðarráðherra hefur boðað lög sem meðal annars kveða á um að auðlindir skuli vera alfarið í eigu opinberra aðila, dreifikerfi að meirihluta í eigu hins opinbera en vinnslan sjálf geti verið í höndum einkaaðila.

Talsmenn Suðurlindar, eins og fyrirtækið heitir, segja að lögsagnarumdæmi sveitarfélaganna liggi saman þvert um nokkur helstu jarðhitasvæði á Reykjanesi og þau eigi því mikilla sameiginlegra hagsmuna að gæta. Öll helstu framtíðarorkusvæðin séu innan þessara sveitarfélaga og er þar vísað til Trölladyngju, Sandfells og Krísuvíkur.

Með tilkomu félagsins þurfa væntanlegir orkukaupendur að tilgreina til hvers og hvar þeir ætla að nýta orkuna og mun félagið svo meta það út frá framtíðarsýn sveitarfélaganna um nýtingu auðlindina á eigin vegum, eða í samstarfi við önnur orkufyrirtæki. Allir flokkar í öllum sveitarfélögunum standa að stofnun þessa félags.