Hanna Birna mætir best en Sigrún Elsa verst

Sigrún Elsa Smáradóttir, borgarfulltrúi Samfylkingarinnar, hefur mætt verst allra borgarfulltrúa á fundi borgarstjórnar Reykjavíkur það sem af er ári.

Haldnir hafa verið 19 borgarstjórnarfundir á árinu og hefur Sigrún Elsa ekki komið á fimm þeirra. Næst á eftir henni koma Gísli Marteinn Baldursson og Þorbjörg Helga Vigfúsdóttir, borgarfulltrúar Sjálfstæðisflokksins, en bæði hafa verið fjarverandi fjórum sinnum á árinu.

Hanna Birna mætir best

Hanna Birna Kristjánsdóttir, borgarstjóri, hefur mætt á alla fundina og aldrei fengið varamann til að koma inn í sinn stað ólíkt flestum öðrum borgarfulltrúum. Borgarfulltrúar geta kallað inn varamenn eigi þeir ekki kost á að mæta þegar fundur í borgarstjórn hefst eða á meðan á fundi stendur.

Kjartan Magnússon, borgarfulltrúi Sjálfstæðisflokksins, hefur líkt og Hanna Birna komið á alla fundi borgarstjórnar en tvívegis hefur hann þurft að fá varamenn til að leysa sig af.

Gísli mætt illa í haust

Frá því að núverandi meirihluti Sjálfstæðisflokks og Framsóknarflokks var myndaður í ágúst hafa verið haldnir átta fundir í borgarstjórn.

Átta borgarfullrúar hafa mætt á þá alla. Gísli Marteinn hefur forfallast fjórum sinnum og Sigrún Elsa þrisvar sinnum. Gísli mætti á alla fundi borgarstjórnar fram að meirihlutaskiptunum í ágúst.