Fundu fíkniefni í kjölfar umferðaróhapps

Karlmaður var í Héraðsdómi Norðurlands eysta dæmdur í 30 daga skilorðsbundið fangelsi fyrir að hafa í fórum sínum ýmiss konar fíkniefni þegar lögregla leitaði á honum eftir umferðaróhapp.

Óhappið átti sér stað í september í fyrra en þá var lögreglan á Akureyri kölluð út vegna bifreiðar sem farið hafði út af veginum við Bægisá í Öxnadal. Í bílnum voru þrír menn og voru þeir allir í annarlegu ástandi.

Lögregla fann hass, amfetamín og e-pillur við leit á mönnunum og í bílnum. Maðurinn sem dæmdur var í dag var ákærður fyrir að hafa einn í vörslu sinni hass og amfetamín en að hafa ásamt hinum 34 e-pillur og tæp 10 grömm af amfetamíni í fórum sínum. Var hann sakfelldur fyrir vörslu allra efnanna.

Maðurinn á að baki fjölmarga refsidóma undanfarin 17 ár en tekið var tillit til þess að hann hefði bætt ráð sitt og neytti ekki lengur vímuefna auk þess sem hann stundaði vinnu. Var því ákveðið að skilorðsbinda refsinguna.