Makrílaflinn margfaldast milli ára

Makrílafli íslenskra skipa hefur tæplega nífaldast á milli ára. Alls hafa 28 íslensk skip og bátar veitt rúmlega 36.300 tonn af makríl á þessu ári. Þar af eru 15 skip með meira en 1000 tonna makrílafla hvert. Júpíter ÞH er aflahæsta skipið með 4381 tonn samkvæmt upplýsingum sem InterSeafood.com hefur fengið hjá Fiskistofu.

Í umfjöllun interseafood segir að makríllinn virðist ætla að verða að nýju bitbeini Íslendinga og Norðmanna á fiskveiðisviðinu því fyrr í vikunni sakaði framkvæmdastjóri samtaka norskra útgerðarmanna íslenskar útgerðir um að falsa aflatölur, landa síld sem makríl og drýgja um leið síldarkvóta sína.

Norðmenn telja að með þessu séu Íslendingar að búa í haginn þannig að þeir eigi auðveldara með að fá úthlutað makrílkvótum á vettvangi Norðaustur-Atlantshafsfiskveiðinefndarinnar (NEAFC) í framtíðinni en Ísland er ekki aðili að samningum um makrílveiðarnar eins og stendur.

Samkvæmt tölum Fiskistofu var makrílaflinn 4223 tonn í fyrra en nú nemur skráður afli 36.330 tonnum. Megnið af þessu afla hefur veiðst í íslenskri lögsögu en tæplega 3000 tonn hafa fengist í færeysku lögsögunni. Makríllinn veiddist aðallega í júlí og ágúst og þar af nam aflinn í júlí um 22 þúsund tonnum