Ekið á gangandi vegfaranda við Suðurver

Betu fór en á horfðist þegar ekið var á gangandi vegfaranda á Kringlumýrarbraut til móts við Suðurver laust eftir hádegi í dag. Þær upplýsingar fengust hjá lögreglu að það hefði verið lán í óláni að vegfarandinn lenti ekki framan á bílnum heldur rann hann með hlið bílsins. Hann var fluttur á slysadeild þar sem talið var að hann hefði ökklabrotnað.

Þá voru þrír farþegar í strætisvagni fluttir á slysadeild eftir að vagninn rakst á fólksbíl á mótum Hafnarfjarðarvegar og Vífilstaðavegar snemma í morgun. Fólkið kvartaði allt undan eymslum í hálsi en ökumaður fólksbílsins slapp hins vegar ómeiddur.

Þá var lögregla og sjúkralið kvatt að Smáralind nú eftir hádegi en þar hafði grafa í grunni norðan við verslunarmiðstöðina oltið. Stjórnandi gröfunnar var fluttur á slysadeild en reyndist ekki mikið slasaður og hélt hann því aftur til vinnu.