Nýr jólasveinn?

Hluti af fiskmetinu, sem stolið var úr Litlu fiskbúðinni í Breiðvangi í Hafnarfirði í fyrrinótt, komst óvænt til skila í gær. Lögreglumenn voru að gera húsleit vegna rannsóknar á fíkniefnamáli, þegar þeir fundu óvenjumikið af fiskmeti á vettvangi.

Þótti þeim með ólíkindum að óreiðumaðurinn, sem þarna réði húsum, hefði sýnt þessa fyrirhyggju við öflun matvæla í stað þess að eyða andvirðinu í fíkniefni, og hringdu í fisksalann. Þekkti hann þar fiskinn sinn og endurheimti eitthvað af humri, skötu og tindabikkju, en ekkert var þar af reykta laxinum, sem saknað er.

Húsráðandi sagði að einhver ótilgreindur hefði gefið sér þetta, svona líkt því og að jólasveininn hefðu laumað þessu í skóinn hans. Lögregla leitar nú þessa jólasveins, en úr vöndu er að ráða þar sem jólasveinar eru um allt þessa dagana.