Þurfum skýra sýn á háskólasamfélagið

Það liggur fyrir samkvæmt hagtölum að það verði að skera meira niður og hagræða í menntakerfinu. Það þarf að hafa skýra framtíðarsýn á það hvernig það er gert, segir Höskuldur Þórhallsson, þingmaður Framsóknarflokksins, sem er málshefjandi í utandagskrárumræðu á Alþingi í dag um framtíð háskólasamfélagsins.

Hann bendir á að menntamálaráðherra hafi boðað aukna samvinnu ríkisháskóla. Þetta segir hann að sé meðal þess sem þurfi að ræða. Sjálfur segist hann ekki vera viss um að sameining skóla sé það rétta í stöðunni. „Ég er ekki viss. Ég tel að þeir háskólar sem hafi verið að spretta upp á undanförnum áratug hafi sýnt gríðarlegt frumkvæði og verið farvegur fyrir nýjar leiðir," segir Höskuldur.

Höskuldur segir mikilvægt að umræðan um íslenska háskólasamfélagið fari fram, því niðurskurður í heilbrigðiskerfinu sé nú að fara fram án þess að nokkur umræða hafi verið tekin um framtíðarstefnu. „Við viljum ekki lenda í sömu sporum næsta haust að ný stefna verði keyrð í gegnum fjárlög án undangenginnar umræðu. Þetta er liður í því," segir Höskuldur.