Geiri ekki að hætta með Goldfinger

Ásgeir Davíðsson sem alltaf er kallaður Geiri er hættur við að opna skemmtistað í gamla Búnaðarbankanum í Austurstræti. Í staðinn opnar hann glæsilegan stað á Grensásveginum sem mun bera nafnið, Steak and Play. Geiri er langt frá því að hætta í bransanum.

„Það tekur auðvitað í að standa í þessu og þetta er ekkert uppáhalds djobb," segir Geiri aðspurður hvort hann sé að draga sig út úr „strippinu" en hann rekur súlustaðinn Goldfinger í Kópavogi. Orðrómur hefur verið á kreiki þess efnis að Geiri vilji losna út úr Goldfinger en hann segir að svo sé ekki.

„Ég er hinsvegar að fara að opna svakalegt dæmi sem mun heita Steak and play, niður á Grensásvegi 7," segir Geiri en það húsnæði hýsti áður súlustaðinn Bóhem.

Húsnæðið er rúmir 500 fermetrar og verður allt til alls að sögn Geira sem stefnir á að opna 10.júlí. „Ég næ því ekki fyrr."

En hvernig staður verður þetta?

„Þetta verður bara eins og að labba inn í kvikmyndahús. Þarna verður allt í sjónvarpsskjám og sér fjarstýringar á hverju borði. Þú getur þá spilað playstation, horft á boltann, golfið eða bara hvað sem er. Það verður allt í svona básum og maturinn verður eins og á alvöru steikhúsi," segir Geiri.

En verða einhverjar fáklæddar stúlkur að dansa?

„Það verða einhverjar konur, en ekki graðar konur," segir Geiri og hlær.