Gay mafían tekur yfir sjónvarpsrásirnar í kvöld

„Gay mafian tekur yfir sjónvarpið í kvöld," segir Beggi hlæjandi. Hann og kærasti hans Pacas eru landsmönnum að góðu kunnir eftir þáttöku sína í Hæðinni. Þeir sýna á sér nýja hlið í kvöld þegar fyrsta innslag þeirra í Íslandi í dag fer í loftið. Þar munu þeir kenna landsmönnum að matreiða létta og litfagra sumarrétti eins og þeim einum er lagið. Á sama tíma verður Eurovision á Ríkissjónvarpinu, með þeim Friðriki Ómari og Regínu Ósk í fararbroddi.

„Við ætlum að vera ofsalega ferskir, með grill og létta salatrétti. Með sól og sumar í hjarta. Þetta verður litríkt og skemmtilegt," segir Beggi. Hann segir þá félaga ekki óttast samkeppnina frá Eurovision. Enda verða þeir félagar að minnsta kosti jafn litskrúðugir og hvaða armenska evróvisjón ungmey sem er.

„Nú vil ég bara að þjóðin velji á milli búninganna í Belgrad eða okkar. Við ætlum ekki að vera í einhverjum hvítum kokkabúningum, þetta verður rosalega litríkt og flott," segir Beggi. Pacas verður í köflóttum jakkafötum, og sjálfur segist Beggi verða í brjálæðislega skræpóttum jakka. „Friðrik Ómar fær hann í verðlaun ef hann vinnur Eurovision," segir Beggi, sem að sjálfsögðu styður okkar fólk í Belgrad.