Verklagsreglur settar um þvagsýnatöku

Kristján L. Möller samgöngur hefur skipað nefnd til þess að búa til reglugerð um samræmdar verklagsreglur fyrir öll lögregluumdæmi um hvernig standa skuli að þvagsýnatöku þegar fólk er grunað um akstur undir áhrifum vímugjafa en neitar að veita þvagsýni. Þetta kom fram í svari hans við fyrirspurn Katrínar Júlíusdóttur, flokkssystur hans, á Alþingi í dag.

Katrín sagði fyrirspurn sína til komna vegna máls sem greint var frá í fjölmiðlum fyrr í sumar en þá tók lögreglan á Selfossi þvagsýni með valdi úr konu sem grunuð var um að hafa ekið undir áhrifum vímugjafa.

Sagði Katrín að málið hefði vakið upp margar spurningar og að fyrrverandi formaður Læknafélags Íslands, ríkissaksóknari og talskona Stígamóta hefðu bent á að verklagsreglur þyrfti að setja. Sagðis Katrín taka undir með fyrrverandi formanni Læknafélags Íslands að þarna hefði verið beitt ofbeldi með ákveðnum hætti. Ekki þyrfti að taka þvingaða þvagprufu. Þá benti Katrín á að Umboðsmaður Alþingis hefði tekið málið til athugunar sem sýndi að hugsanlega hafi verið eitthvað að.

Kristján L. Möller samgönguráðherra sagðist telja afar brýnt að setja slíkar verklagsreglur og benti á að umferðarlög frá árinu 2003 gerðu beinlínis ráð fyrir því. Því hefði hann skipað nefnd sem ætlað væri að setja reglugerð þar um en í nefndinni eiga meðal annar sæti fulltrúar Ríkislögreglustjóra, Ríkissaksóknara og sýslumannsins á Selfossi þar sem umrætt mál kom upp. Sagðist Kristján telja að gæta yrði að mannlegri reisn við sýnatöku en jafnframt að tryggja lögreglu öruggt starfsumhverfi og skýran lagaramma.