Hjúkrunarfræðingar sendi tölvupóst til að fá 30.000 kr.

Á síðasta fundi stjórnar Félags íslenskra hjúkrunarfræðinga var ákveðið að fara þess á leit við þá hjúkrunarfræðinga sem eru á netfangaskrá félagsins, að þeir leggðu sitt af mörkum til að knýja fram 30 þúsund króna álagsgreiðslu á mánuði til hjúkrunarfræðinga, líkt og dómsmálaráðherra hefur ákveðið að greiða lögreglumönnum.

Því er farið á leit við hjúkrunarfræðinga að þeir sendi tölvupóst til Guðlaus Þórs Þórðarsonar heilbrigðisráðherra, Árna M. Mathiesen, fjármálaráðherra, Jóhönnu Sigurðardóttur, félagsmálaráðherra og Ingibjargar Sólrúnar Gísladóttur, utanríkisráðherra og formanns Samfylkingarinnar þar sem áréttuð er ályktun félagsráðsfundar hjúkrunarfræðinga frá í síðasta mánuði.

Á fundinum í síðasta mánuði var fagnað þeirri ákvörðun dómsmálaráðherra að nýta kjarasamningsbundið ákvæði í samningum lögreglumanna um greiðslu vegna sérstakra tímabundinna álagsþátta. Fundurinn harmaði að heilbrigðisráðherra hafi ekki nýtt sér þessi samningsbundnu úrræði gagnvart hjúkrunarfræðingum.

Félagsráðsfundur Fíh krafðist þess að öllum hjúkrunarfræðingum á stofnunum ríkisins verði nú þegar greidd 30.000 króna mánaðarleg álagsgreiðsla út samningstíma núgildandi kjarasamnings