Góður stígandi í atriðinu fyrir kvöldið

"Mér líst bara vel á spádóminn," segir Örlygur Smári lagahöfundur framlags Íslands til Söngvakeppni evrópskra sjónvarpsstöðva This Is My Life þegar Visir les fyrir hann framtíðarspádóm Eurobandsins.

"Síðara rennslið í gær var enn betra en fyrr um daginn. Það lítur því út fyrir að það sé góður stígandi í atriðinu og vonandi næst toppurinn á laugardaginn í úrslitunum því þangað setjum við að sjálfsögðu stefnuna."

Spáð í Eurobandið: Friðrik og Regína fá notið sín tilfinningalega og líkamlega þar sem öryggi, jafnvægi og friður einkennir umhverfi þeirra í Belgrad. Sigur og velferð eru einkunnarorðin hér því þau hafa sýnt þolinmæði í verki og hugsun og á sama tíma unnið heiðarlega fram að þessu. Viðurkenning fyrir vel unnin störf bíður þeirra í kvöld. Þau komast upp úr riðlakeppninni.