Rannsókn Íslendinga á eldgosunum vekur heimsathygli

Mælanet hefur gefið Íslendingum færi á að vakta Eyjafjallajökul um árabil og að rekja upphaf eldsumbrotanna átján ár aftur í tímann. Með hjálp gervihnattamælinga hefur nú tekist að kortleggja nákvæmlega hvernig kvikan hreyfðist undir eldstöðinni, að sögn Freysteins Sigmundssonar jarðeðlisfræðings.

Athygli vekur að miðja kvikusöfnunar var undir Skógaheiði. Gögnin sýna að mánuðina fyrir gosið á Fimmvörðuhálsi myndaðist mikið kvikuinnskot þar undir. Sú kvika snerti síðan aðra tegund kviku á um fjögurra kílómetra dýpi og setti af stað nýtt eldgos í toppgígnum.

"Þegar innskotið komst í snertingu við aðra kviku, - það hleypti sprengigosinu af stað," segir Freysteinn.

Birting tímaritsins Nature á niðurstöðunum þykir viðurkenning á því að þær varpi nýju ljósi á hegðun eldfjalla sem sjaldan gjósa á jörðinni.

En er eldgosinu lokið?

Já, svarar Freysteinn, og segir að líta verði svo á að þetta hafi verið tvö eldgos; eldgos á Fimmvörðuhálsi og eldgos í toppgíg Eyjafjallajökuls og því hafi lokið seinnipartinn í maí.