Páll Magnússon: Laun mín í takt við aðra stjórnendur

Páll Magnússon útvarpsstjóri segir að laun sín séu nálægt því sem gengur og gerist hjá framkvæmdastjórum í meðalstórum fyrirtækjum á Íslandi.

Páll vill ekki tjá sig um það hvaða breytingum launakjör starfsmanna Ríkisútvarpsins muni taka. Hann segir að laun starfsmanna séu háð kjarasamningum sem renni út í byrjun næsta árs. Kjör þeirra haldist óbreytt þangað til að samningar losni. Hann segist ekki geta tjáð sig um það núna hvernig næstu samningar verði.

Páll segir að með breytingu á rekstrarfyrirkomulagi Ríkisútvarpsins hafi tekist að gera reksturinn skilvirkari og þannig hægt að skapa svigrúm til að stórauka innlenda dagskrárgerð. Því hafi verið staðið við það sem hann hafi sagt á fundi menntamálanefndar þegar frumvarpið var í þinginu.

Laun Páls tvöfölduðust nærri því þegar Ríkisútvarpinu var breytt í opinbert hlutafélag. Hann er nú með um 1500 þúsund krónur á mánuði. Inni í laununum eru reiknuð öll hlunnindi Páls, svo sem bílahlunnindi. Páll ekur um á afar glæsilegum Audi Q7.

Starfsmenn RÚV segjast fagna launahækkun Páls og muni taka hana til viðmiðunar í næstu kjarasamningum.