Styrktu Lyngás um milljón í minningu Fanneyjar Eddu

Samstarfsfélagar foreldra Fanneyjar Eddu Frímannsdóttur, tæplega þriggja ára stúlku sem lést fyrr á þessu ári úr taugahrörnunarsjúkdómi, afhentu Lyngási ríflega eina milljón króna í morgun. Fénu söfnuðu þeir með sölu á laginu „Ljós í myrkri" sem sungið er af Páli Óskari. Höfundur lagsins er Gunnar Guðmundsson og textasmiður er Vignir Örn Guðnason, en þeir starfa báðir með foreldrum Fanneyjar Eddu hjá Flugfélagi Íslands. Lagið er enn til sölu.

Styrkurinn var afhentur Lyngási, sem er dagvistun fyrir fötluð börn og unglinga, við hátíðlega athöfn þar sem Páll Óskar tók lagið með hljómsveitinni Föxunum sem skipuð er níu flugmönnum Flugfélags Íslands.

Lagið „Ljós í myrkri" var samið til styrktar Fanneyju Eddu en hún lést skömmu eftir að lagið var tilbúið til flutnings. Hún var þá rétt tæplega þriggja ára gömul.

Birna Björnsdóttir, forstöðumaður Lyngáss, segir styrkinn koma sér ákaflega vel en daglega dvelja 26 börn og ungmenni á Lyngási.

Til stendur að endurnýja einskonar hljóðfæri sem kallast „sound beam" fyrir hluta af söfnunarfénu en um er að ræða hljómborð með sérstökum hljóðnema sem nemur hljóð, blástur og hreyfingar, og kemur þeim til skila með tónum. Hljóðfærið er afar vinsælt hjá börnunum á Lyngási og er afar þroskandi.

Af þeim 26 börnum og ungmennum sem daglega koma á Lyngás eru sjö á leikskólaaldri. Fjögur börn um eins árs aldurinn byrjuðu á Lyngási á þessu ári. Nítján börn og ungmenni yfir sex ára sækja daglega þroskandi afþreyingu, þjálfun og samveru á Lyngási.

Í marsmánuði var ítarlega fjallað um sögu Fanneyjar Eddu í Íslandi í dag þar sem rætt var við foreldra hennar og greint frá hetjulegri baráttunni við taugahrörnunarsjúkdóminn. Fanney Edda lést skömmu síðar úr þessum illvíga sjúkdómi og var greint frá því í fréttum Stöðvar 2 í apríl að samstarfsfélagar foreldra hennar hefðu samið lag og að ágóði af sölu þess rynni til styrktar Lyngási.

Enn er hægt að kaupa lagið, bæði í gegn um vefsíðuna Ljós í myrkri, en einnig eru eintök eftir hjá stærstu verslunum N1 á höfuðborgarsvæðinu. Allur ágóði rennur til Lyngáss, sem rekið er af styrktarfélaginu Ási.

Þeim sem vilja kynna sér starfsemi Lyngáss er bent á að smella hér.