Umferðaróhöpp á helstu stofnæðum

Töluverðar umferðartafir urðu í borginni í morgun vegna umferðaróhappa sem urðu á stofnbrautum sem liggja frá nágrannasveitarfélögum og úthverfum inn í Reykjavík.

Tveir árekstrar urðu á Kringlumýrarbraut, einn í Ártúnsbrekku, annar á Reykjanesbraut við IKEA og tveir á Gullinbrú. Að sögn lögreglunnar urðu ekki slys á fólki í árekstrunum sex en þeir höfðu allir áhrif á umferðina.

Lögregla segir í raun ekkert mega koma upp á í umferðinni til þess að tafir verði á henni og í tilvikum sem þessum springi kerfið í raun. Fréttastofa hefur spurnir að því að það hafi tekið fólk allt upp undir klukkutíma að komast úr Hafnarfirði til Reykjavíkur.

Dráttarbílar fjarlægðu síðustu bílana sem skemmdust í óhöppunum nú laust fyrir klukkan tíu en ökumenn dráttarbílanna áttu eins og aðrir ökumenn erfitt með að komast leiðar sinnar í morgun.