Æ fleiri kveðja nagladekkin

Æ fleiri landsmenn hafna nagladekkjunum og búa sig undir vetrarfærðina með öðrum leiðum. Fagnaðarefni, segja heilbrigðisyfirvöld, enda minni hætta á svifryki.

Brjálað er að gera hjá dekkjaverkstæðum norðan heiða um þessar mundir enda hálka víða, svo sem á götum Akureyrar. Einn ók á kyrrstæðan bíl og annar á skilti og hafa margir brugðist við með því að skipta yfir á vetradekk. En vinsældir naglanna eru á undanhaldi segja dekkjasalar.

Mælingar á svifryki hafa sýnt að svifryksvandinn er enn meiri á Akureyri en í Reykjavík. Haft hefur verið á orði að aðstæður til vetraraksturs séu ólíkar norðanlands og á höfuðborgarsvæðinu og þótt negld dekk verði senn tímaskekkja í Reykjavík þurfi að aka um á nöglum á Akureyri.

Alfreð Schiöth sem starfar hjá Heilbrigðiseftirlit Norðlendinga telur málið alls ekki þannig vaxið. Hann fagnar vinsældum ónegldra dekkja og segir að önnur dekk séu alltaf að verða betri og betri. Það sé mjög jákvætt fyrir svifryksmengun og aðra loftmengun að menn losi við naglana.