Litháarnir grunaðir um að stela rakvélarblöðum fyrir hálfa milljón

Í gæsluvarðhaldsúrkurði yfir einum Lithánna sem handtekinn hefur verið vegna gruns um aðild að stórfelldu, skipulögðu búðarhnupli hér á landi kemur fram að Litháarnir níu sem sitja í gæsluvarðhaldi vegna málsins eru grunaðir um að stela rakvélarblöðum fyrir tæpa hálfa milljón króna.

Virði rakvélarblaðanna sem Litháarnir eru grunaðir um að hafa hnuplað er 483.598 krónur. Þeir eru grunaðir um að hafa hnuplað rakvélarblöðunum í minnst tíu ránsleiðangrum úr matvöruverslunum víðs vegar um höfuðborgarsvæðið.

Auk rakvélarblaðanna virðast Litháarnir vera spenntastir fyrir fatnaði, en þeir eru grunaðir um að hafa látið greipar sópa í Inter Sport, Herragarðinum og 66 gráður norður og GPS tækjum en á heimili eins þeirra fundust nokkur tæki þeirrar gerðar sem saknað var eftir innbrot í bíla skömmu áður.

Alls eru níu Litháar í gæsluvarðhaldi vegna þessa sérstaka sakamáls. Þeir eru allir á aldrinum 20 til 30 ára.

Það komst upp þegar tveir þeirra hugðust smygla hluta af meintu þýfi sínu til félaga síns á Litla-Hrauni. Árvökull fangavörður kom í veg fyrir það og í kjölfarið komst lögreglan á spor Litháanna.