Skattbyrði þyngdist úr 31,2% upp í 41,4% á einum áratug

Ríki og sveitarfélög eru frek til fjárins. Af hverjum fimm krónum sem landsmenn vinna sér inn tekur hið opinbera tvær krónur, samkvæmt tölum um skattbyrði.

Fyrir um tveimur áratugum nam skattbyrði hérlendis, samkvæmt tölum OECD, um 28 prósentum en var komin upp í 31,2 prósent þegar síðasta ríkisstjórn tók við árið 1995. Eftir það fór byrðin snarhækkandi. Aldamótaárið 2000 var hún komin í 38 prósent og milli áranna 2004 og 2005 hækkaði hún úr 38,3 upp í 41,4 prósent. Tölurnar fyrir árið 2006 eru frá fjármálaráðuneyti og sýna að hún lækkar á milli ára niður í 40,4 prósent.

Í samanburði við helstu nágrannalönd sést að Ísland er enn undir hinum Norðurlöndunum. Í Svíþjóð mælist skattbyrðin hæst, 50,1%, í Danmörku 49%, í Noregi 43,6 prósent og í Finnlandi 43,5. Af nágrannalöndum með lægri skattbyrði má nefna Bretland með 37,4%, Þýskaland 35,7%, Írland 31,7%, Kanada 33,4 prósent en í Bandaríkjunum mælist skattbyrðin 28,2%.