Rannsaka ástæður stjórnarslita í borginni

Sjálfstæðismenn í Reykjavík rannsaka nú atburðarrásina sem varð til þess að meirihlutinn í Reykjavík féll.

Borgarfulltrúar sjálfstæðismanna hafa verið kallaðir til fundar í höfuðstöðvar flokksins í Valhöll þar sem farið hefur verið yfir atburðarásina. Það er Vörður, félag Sjálfstæðismanna í Reykjavík, sem hefur staðið að þessari rannsókn á framvindunni í borginni.

Eins og fram hefur komið í fréttum ríkti ekki eining innan borgarstjórnarflokks sjálfstæðismanna áður en meirihlutinn með Framsóknarflokknum féll. Björn Ingi Hrafnsson, borgarfulltrúi Framsóknarflokks, hefur ítrekað bent á að borgarstjórnarflokkur Sjálfstæðismanna hafi farið á bak við oddvita sinn, Vilhjálm Þ. Vilhjálmsson fyrrum borgarstjóra. Því hafi ekki verið unnt að halda meirihlutasamsarfinu gangandi.

Stjórn Varðar mun hittast í hádeginu í dag á fundi í Valhöll til að ræða málefni borgarstjórnarflokksins en ætlunin er að varpa ljósi þetta mál í heild sinni.