Einar Skúlason ráðinn skrifstofustjóri hjá framsókn

Einar Skúlason hefur verið ráðinn skrifstofustjóri þingflokks framsóknarmanna. Einar tekur við starfinu af Helgu Sigrúnu Harðardóttur sem nýverið tók sæti á Alþingi við brotthvarf Bjarna Harðarsonar. Einar hefur undanfarin ár starfað sem framkvæmdastjóri Alþjóðahúss. Í samtali við Vísi segir hann að sér lítist vel á nýja starfið.

Einar er með B.A.-gráðu í stjórnmálafræði frá Háskóla Íslands og MBA-gráðu frá Háskólanum í Edinborg. Einar hefur áður tekið þátt í starfi Framsóknarflokksins og gegnt trúnaðarstörfum fyrir flokkinn. Hann sat m.a. í stjórn Sambands ungra framsóknarmanna frá 1996 til 2002, þar af sem formaður 1999-2002. Einar sat einnig í Stúdentaráði HÍ fyrir Röskvu - samtök félagshyggjufólks, árin 1995-1997 og gegndi starfi framkvæmdastjóra þess árin 1996-1997," segir í tilkynningu frá Framsóknarflokknum.

Þá kemur fram að Einar muni hefja störf hjá þingflokknum um næstu áramót. „Mér líst bara vel á þetta og er spenntur fyrir því að fara að taka á málum,“ segir Einar í samtali við Vísi. Hann segir þetta hluta af ákveðnum kynslóðaskiptum í flokknum. „Ég er líka búinn að vera í rúm fimm ár í Alþjóðahúsinu og það er ekki mjög gott að vera á sama staðnum of lengi.“

„Um leið og Einar er boðinn velkominn til starfa eru Helgu Sigrúnu þökkuð góð og óeigingjörn störf á liðnum árum og henni óskað velfarnaðar í nýju starfi," segir að lokum í tilkynningu flokksins.