„Pogba lifir í draumaheimi“

Gamlar Manchester United-hetjur hafa keppst við að segja Paul Pogba til syndana að undanförnu, nú síðast Paul Scholes sem segir Pogba lifa í sínum eigin „draumaheimi“.

„Það ríkir óvissa með Pogba. Fer hann eða ekki? Í gegnum tíðina hefur United misst frábæra leikmenn og það hefur ekki haft mikil áhrif á þá,“ sagði Scholes.

Hann segir að Pogba sé kominn á þann aldur að hann verði að vera stöðugari í leik sínum.

„Við þekkjum hann öll og tölum alltaf um hæfileika. En hann er 26 ára og verður spila oftar vel. Hann getur verið leikmaður í heimsklassa en kannski þarf hann mann með sér sem lætur hann heyra það reglulega og heldur honum á tánum,“ sagði Scholes.

„Ef ekki heldur hann áfram í sínum eigin draumaheimi og heldur að hann sé bestur.“

Pogba hefur skorað 13 mörk og gefið níu stoðsendingar í 33 leikjum í ensku úrvalsdeildinni í vetur. United er í 6. sæti deildarinnar.