United á von á tilboði frá PSG í De Gea

Manchester United undirbýr sig undir kauptilboð frá Paris Saint-Germain í David de Gea samkvæmt heimildum ESPN.

Eftir að tilkynnt var að Gianluigi Buffon yrði ekki áfram hjá PSG er búist við því að frönsku meistararnir nái sér í annan markvörð.

Illa hefur gengið hjá United að semja við de Gea um framlengingu en hann á eitt ár eftir af samningi sínum við félagið. Samkvæmt frétt ESPN eru menn innan United staðfastir í því að þeir ætli ekki að selja spænska markvörðinn í sumar en það gæti orðið erfitt að standast risatilboð frá PSG.

De Gea hefur verið ítrekað orðaður frá United, oftast hefur hann verið sagður á leið til heimalandsins til Real Madrid og þá er Juventus einnig sagt sýna honum áhuga. PSG er hins vegar stærsta ógnin að mati United.

Juventus gæti átt erfitt með að punga út þeim fjárhæðum sem þyrfti fyrir markvörðinn og þá er aðaláhersla Real ekki á markvörðum í sumar.

Samkvæmt heimildum ESPN er de Gea opinn fyrir því að vera áfram á Old Trafford. Fimm ára samningur upp á 350 þúsund pund í vikulaun er á samningsborðinu en enn hefur ekki náðst samkomulag á milli de Gea og United.