Almiron hetja Newcastle sem flýgur upp í efri hluta töflunnar

Á St. James´s Park skoraði Miguel Almiron sitt fyrsta mark er Newcastle United lagði Crystal Palace. Mark Almiron á 83. mínútu reyndist eina mark leiksins og Newcastle því komið í 9. sætið og upp að hlið Manchester United með 25 stig en Man Utd á þó leik til góða. Crystal Palace er sem fyrr í 11. sæti með 23 stig.

Southampton kom öllum að óvörum og vann öruggan sigur á útivelli gegn Aston Villa í dag. Danny Ings kom gestunum yfir strax á 21. mínútu leiksins og aðeins tíu mínútum síðar hafði Jack Stephens tvöfaldað forystu gestanna. Staðan 2-0 fyrir Southampton í hálfleik. Danny Ings var svo aftur á ferðinni í síðari hálfleik áður en Jack Grealish minnkaði muninn fyrir heimamenn.

Sigurinn fleytir Southampton upp fyrir Aston Villa í töflunni og upp úr fallsæti. Southampton í 17. sæti með 18 stig en Aston Villa í því 18. með 15 stig.