Enski boltinn

Grealish vekur nú athygli á réttum forsendum

Hjörvar Ólafsson skrifar
Jack Grealish.
Jack Grealish. Getty/Neville Williams

Jack Grealish var í broddi fylkingar í endurkomu Aston Villa á móti Brighton í níundu umferð ensku úrvalsdeildarinnar í knattspyrnu karla um helgina. Grealish jafnaði metin fyrir nýliðana og átti svo stoðsendinguna í sigurmarki Aston Villa sem Matt Targett skoraði.

Aston Villa hefur nú haft betur í tveimur leikjum í röð í deildinni og er enn fremur taplaust í síðustu þremur leikjum sínum. Uppskeran eftir níu umferðir er 11 stig sem þýðir að liðið situr í 11. sæti deildarinnar. Þetta er í fyrsta skipti síðan árið 2015 sem Aston Villa fer með sigur af hólmi í tveimur deildarleikjum í röð í efstu deild.

Þetta var annað mark Grealish í deildinni á yfirstandandi leiktíð en hann hefur þar að auki lagt upp þrjú mörk fyrir samherja sína. Hann hefur því komið að þriðjungi marka Aston Villa í vetur en hann er þar að auki oft sá sem hefur álitlegar sóknir liðsins af miðsvæðinu. Þessi 24 ára gamli sóknartengiliður hefur þráfaldlega verði orðaður við brottför frá Aston Villa til stærri liða í gegnum tíðina en hann hélt tryggð við uppeldisfélag sitt og ætlar nú að sjá til þess að liðið festi sig í sessi í efstu deild.

Grealish hefur ávallt stutt Aston Villa og hóf að æfa með liðinu sex ára gamall. Það var svo 13 árum síðar sem Grealish lék sinn fyrsta deildarleik fyrir liðið en þá kom hann inn á fyrir Ryan Bertrand í tapi gegn Manchester City. Tæpu ári síðar hóf hann sinn fyrsta leik fyrir Aston Villa og vorið 2015 átti hann stórleik þegar liðið lagði Liverpool að velli í undanúrslitum ensku bikarkeppninnar. Grealish lagði upp sigurmark Fabian Delph. Hann spilaði svo allan leikinn þegar Aston laut í lægra haldi fyrir Arsenal í úrslitaleiknum.

Getty/Neville Williams

Rataði á síður fjölmiðlanna vegna uppátækja sinna

Honum fylgdu einnig vandræði utan vallar og Tim Sheerwood sem þá var knattspyrnustjóri Aston Villa kom sínum manni til varnar þegar enskir fjölmiðlar birtu mynd af honum að anda að sér hláturgasi vorið 2015. Öllu jákvæðari fregnir bárust hins vegar af honum um haustið sama ár þegar hann skoraði sitt fyrsta mark fyrir Aston Villa.

Keppnistímabilið 2015 til 2016 er hins vegar tímabil sem Grealish vill sennilega gleyma þar sem hann spilaði 16 deildarleiki á þeirri leiktíð og beið ósigur í þeim öllum. Aston Villa féll vorið 2016 en liðið hafnaði í neðsta sæti deildarinnar. Tímabilið þar á eftir byrjaði ekki gæfulega hjá Grealish þar sem hann var nappaður í partýi sem dróst fram á morgun á hóteli í Birmingham og Tony Xia, þáverandi eigandi Aston Villa, skammaði hann á Twitt­er-síðu sinni. Skömmu síðar var Grealish svo úrskurðaður í þriggja leikja bann fyrir að traðka á Conor Coady, leikmanni Wolves, í leik liðanna.

Leiktíðina 2017 til 2018 mistókst Aston Villa svo að komast upp í efstu deild og vegna fjárhagsvandræða liðsins var talið að félagið þyrfti að selja Grealish og fleiri lykil­leikmenn liðins. Grealish þakkaði stuðningsmönnum Aston Villa fyrir að loknum síðasta leik þess tímabils með þeim hætti að talið var að hann væri á förum frá félaginu.

Forráðamenn Tottenham Hot­spur voru taldir hafa klófest kappann og tryggt sér þjónustu hans. Grealish ákvað þó að halda kyrru fyrir hjá Aston Villa og hjálpa liðinu að komast aftur upp í deild þeirra bestu. Sé horft í kristalskúluna má sjá fyrir sér að Tottenham Hotspur muni líta til Grealish á nýjan leik ef Christian Eriksen fer frá Lundúnaliðinu. Þá er spurning hvort hjartað ráði för eða hann ákveði að færa sig yfir í lið þar sem hann á möguleika á að leika í Meistaradeild Evrópu og berjast um titla.

Getty/Alex Livesey

Færist nær enska landsliðinu með góðri spilamennsku

Eftir sveiflukennt gengi á síðasta tímabili fór aftur á móti að birta til hjá Aston Villa síðastliðið vor. Grealish var í mars fyrr á þessu ári gerður að fyrirliða liðsins og hann leiddi liðið upp í úrvalsdeildina þar sem liðið hefur bara plumað sig vel. 

Það er augljóst þegar horft er á leiki Aston Villa að Grealish er annt um félag sitt og þráir það heitt að liði sínu gangi vel. Hann er óþreytandi við að hlaupa og djöflast í andstæðingum sínum þegar Aston Villa er ekki með boltann. Að sama skapi er Grealish ávallt boðinn og búinn að fá boltann þegar samherjar hans hafa hann. Þá er Grealish sífellt að freista þess að skapa usla með klókum og vel útfærðum hlaupum sínum með og án bolta.

Grealish sem á kost á að leika með írska landsliðinu hefur gefið það út að hann vilji leika fyrir England. Eftir að James Maddison virðist hafa klúðrað tækifæri sínu hjá enska landsliðinu með því að tilkynna veikindi í síðustu verkefnum liðsins og nást svo á mynd á spilavíti sama kvöld og enska liðið var að spila er líklegt að Gareth Southgate þjálfari Englands muni líta til Grealish næst þegar hann velur landsliðshóp.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.