Gylfi hvíldur er Everton komst í 8-liða úrslitin

Everton komst í 8-liða úrslit enska deildarbikarsins með sigri á Watford á Goodison Park í kvöld.

Eftir markalausan fyrri hálfleik var það Mason Holgate sem braut ísinn fyrir Everton á 72. mínútu. Richarlison innsiglaði svo sigurinn í uppbótartíma leiksins.

Lokatölur urðu 2-0 og Everton komið áfram í bikarnum.

Gylfi Þór Sigurðsson var hvíldur og sat allan leikinn á varamannabekknum.

Leicester og Colchester tryggðu sig einnig áfram en þau unnu bæði 3-1 sigra. Oxford United vann Sunderland í vítaspyrnukeppni og fylgir liðunum því í 8-liða úrslitin.