Bamford skaut Leeds á toppinn
Patrick Bamford skoraði bæði mörk Leeds United í 0-2 sigri á Wigan Athletic í 3. umferð ensku B-deildarinnar í dag.
Leeds er á toppi deildarinnar með sjö stig líkt og nýliðar Charlton Athletic, West Brom og Millwall sem Jón Daði Böðvarsson leikur með.
Selfyssingurinn kom reyndar ekkert við sögu þegar Millwall vann 1-0 sigur á Sheffield Wednesday á heimavelli. Millwall var manni færri frá 43. mínútu þegar Jed Wallace var rekinn af velli.
Patrik Sigurður Gunnarsson og Kolbeinn Finnsson voru ekki í leikmannahópi Brentford sem gerði 1-1 jafntefli við Hull City á heimavelli.
Derby County, sem var hársbreidd frá því að komast upp í ensku úrvalsdeildina í vor, gerði 2-2 jafntefli við Stoke City sem hefur ekki enn unnið leik á tímabilinu.
